Kokteilsósa

Mér finnst kokteilsósurnar sem hægt er að kaupa ekkert rosalega góðar, aðeins of mikið af majonesi og svona. Þannig ég geri oft þessa mína eigin. Uppskriftin hér að neðan er með sirka magntölum, best að smakka sig til með þetta.

Kokteilsósa

1 dós sýrður rjómi
sirka 1,5 dl. majones ( ég set yfirleitt jafn mikið af majonesi og ég set af sýrðum rjóma, en fyrir hollari sósu má minnka majonesmagnið – best að smakka bara til)
3-4 msk. tómatsósa
1-1,5 msk. Worchestshire sósa
0,5 msk. sinnep, gott að nota t.d. hunangssinnep

Öllu blandað saman, best að smakka til og bæta við ef þess þarf. Það er líka gott að setja smá chilitómatsósu í staðinn fyrir hluta af tómatsósunni, þá verður þetta aðeins meira spicy.

Beikonvafðar döðlur

Ef manni vantar einhvern smárétt til að hafa í veislu, eða einfaldan forrétt þá er mjög einfalt að gera beikonvafðar döðlur. Ég hef t.d. boðið upp á þetta sem smá forréttasmakk í matarboði og var þá með þetta í skál og með tannstönglum og sweet chili sósu til hliðar þannig fólk gat fengið sér eins og það vildi. En það má að sjálfsögðu bera þetta fram t.d. nokkur saman á spjóti á diski eða hvernig sem er.

Það er ekkert mál að undirbúa þetta deginum áður og svo bara hita þegar á að borða þetta. Einfaldast er að hafa bara döðlur og beikon, en það verður enn betra að setja ost, t.d. gráðaost, í döðlurnar, þannig ég reyni að gera það þannig þegar ég nenni. Uppskriftin er mjög einföld, og magnið sem er notað fer alveg eftir því hvað maður ætlar að gera mikið af þessu. En það fer ekkert sérstaklega mikið af ostinum í hverja döðlu.

Beikonvafðar döðlur:

Döðlur – best að velja stórar og góðar, en það má alveg nota ódýrustu gerðina líka

Beikon – reyna að velja beikon með lítilli fitu og sem er frekar langt

(Gráðaostur eða annar góður ostur, t.d. mozzarella, mexikóostur eða brie)

Beikonið er skorið í tvennt, þannig að þetta verði lengjur sem eru 7-10 cm. sirka. Ef það á að vera ostur í döðlunum er skorin smá rauf í þær og smá bút af osti stungið inn. Beikonið er vafið um döðluna og reynt að þrýsta því vel að svo að það haldist. Það má líka nota tannstöngla til að festa þetta, en ég sleppi því oftast og reyni bara að fara varlega þegar ég steiki þetta.

Þetta er svo annað hvort steikt á pönnu eða í eldföstu móti við 200-220°C þar til beikonið er orðið stökt. Borið fram með t.d. sweet chili sósu.

Einfalt eplapæ a’la Svíþjóð + karamellusósa

Svíar elska að gera allskonar pæ, eplapæ, berjapæ og svo framvegis. Oftast gera þeir það sem þeir kalla “Smulpaj”, en þá er ekki venjulegt deig heldur svona deigkurl (e. “crumble”). Þetta er alveg rosalega einfalt en samt mjög gott. Hér kemur grunn uppskriftin, en henni má breyta t.d. þannig að maður setur helming af haframjöli á móti hveitinu – það kemur vel út og er enn meira “crunchy”. Þessa dagana er svo í uppáhaldi eplapæ með svona deigi og karamellusósu yfir allt saman. Það verður alveg rosalega gott og er ekkert mikið tímafrekara, þannig ég læt uppskriftina af karamellusósunni fylgja, en það þarf alls ekki að nota hana, þetta er mjög gott án hennar líka.

Þessi uppskrift af deiginu dugar fyrir sirka 4-6:

Pædeig:

125 gr. smjör

3 dl. hveiti (eða 1,5 dl. hveiti og 1,5 dl. haframjöl)

1 dl. sykur

Ávextir:

3-4 dl. epli í sneiðum eða ber eða aðrir ávextir

1/2 – 1 1/2 dl. sykur (fer eftir því hversu súrir ávextirnir eru, fyrir eplapæ þarf sirka 1 dl.)

2-3 tsk. kanill ef þetta er eplapæ

Karamellusósa:

110 gr. smjör

3 msk. hveiti

1/2 bolli sykur

1/2 bolli púðursykur

1/4 bolli vatn

Smjörið er skorið í teninga eða minni bita og svo er því blandað saman við hveiti og sykur. Best að nota puttana til að mylja þetta saman, þannig úr verður eins konar mulningur.

Smjörið fyrir karamellusósuna er brætt í potti, hveitinu er bætt við og blandað saman. Sykrinum, púðursykri og vatni bætt út í og látið malla í 5 mín.

Ávextirnir eru blandaðir saman við sykur (+ kanil) og svo settir í eldfast mót. Mulningnum stráð yfir og ef það á að vera karamellusósa er henni helt yfir þetta allt saman. Svo er þetta bakað við 200-225°C  í sirka 20 mín, eða þangað til ávextirnir eru orðnir mjúkir.

Þetta bragðast mest með vanillurjóma í fernum frá Milda sem fæst í flestum búðum sjá hér, en það er líka gott að hafa ís eða venjulegan rjóma með þessu.

Heimagerð pizza og pizzasósa

Mér finnst pizzur sem fást á flestum pizzastöðum bæjarinns ekkert sérstakar, alveg ágætar í neyð, en ekkert meira en það. Það eru alveg 2-3 ár síðan ég fór að gera pizzurnar oftast bara heima í staðinn fyrir að panta þær, en það sem mér hefur fundist erfiðast er að finna uppskrift af deigi sem er góð. Fyrst keypti ég alltaf pizzadeigsrúllurnar sem fást í flestum búðum og svo Hunts pizzasósu sem fékkst í áldósum (finnst þessi í brúsunum ekki góð), en svo rakst ég á snilldar uppskrift af deigi sem klikkar aldrei. Pizzurnar verða mjúkar og góðar, með góðum mjúkum endum, en ekki of þykkar eða of þunnar eins og mér finnst oft gerast þegar maður bakar sjálfur. Svo er þetta líka alveg hrikalega bragðgott. Hunts pizzasósan hætti að fást í búðunum þannig ég fór að gera mína eigin sósu líka. Þessi samsetning finnst okkur svo svakalega góð að við höfum frekar fyrir því að gera þetta heima heldur en að panta þetta dýrum dómum af einhverjum stöðum. Svo er náttúrulega snilld að geta stjórnað álegginu sjálfur, og þá er í mesta uppáhaldi að gera pizzu bara með sósu, osti og sveppum og svo þegar pizzan er bökuð skelli ég hráskinku, parmesan, klettasalati og ferskri basiliku á þetta.

Hér kemur svo uppskriftin af deiginu og sósunni. Þetta eru frekar stórar uppskriftir og duga fyrir sirka 4 stórar pizzur (álíka stórar og ofnplötur). En ekkert mál að helminga uppskriftirnar, eða frysta afganginn af deiginu þangað til seinna og geyma restina af sósunni bara í ísskáp.

Pizzadeig

1 kg. Hveiti

1 msk. hunang

1 msk. salt

14 gr. þurrger

4 msk. olía

600-650 ml. volgt vatn

Hveiti og salt sett í skál. Hunangið er leyst upp í vatninu ásamt þurrgerinu. Best að byrja á að nota 600 ml. vatn og bæta frekar við ef þess þarf. Þegar það fer að freyða er því, ásamt olíunni bætt út í  hveitið. Hnoðað saman og látið hefast í sirka klst. Pizzurnar er best að baka í mjög háum hita (en fylgjast vel með svo þær brenni ekki). Ég er yfirleitt með ofninn stilltan á 250-275° C og þá heppnast þetta fullkomlega. Tekur bara nokkrar mínútur, bara lyfta pizzunni örlítið og kíkja undir til að vera viss um að hún sé tilbúin.

Pizzasósa

5-6 hvítlauksrif

smá olía

2 litlar dósir af tómatpúrru

1 ferna af tómat “passata” eða 1-2 dósir af hökkuðum tómötum (tómat passata eru fínt maukaðir tómatar og fæst í fernum frá euroshopper – mér finnst það betra heldur en hökkuðu tómatarnir því mér finnst ekki gott að hafa tómatbita í þessu)

pizzakrydd (oregano, timjan, basilika)

salt

Hvítlaukurinn hakkaður smátt og steiktur upp úr olíunni. Tómatpúrru og tómatmauki bætt út í og svo kryddinu. Best að smakka þetta til með salti eða kjötteningi. Það er líka gott að setja smá chili ef maður vill hafa þetta smá spicy. Svo er þetta látið malla í smá stund, eða þangað til þetta er hæfilega þykkt og bragðast vel.

Focaccia brauð

Þetta brauð hef ég gert mjög oft, enda er það alveg rosalega einfalt og erfitt að mistakast með það. Þetta passar mjög vel með pestó, ostum, hummus og svoleiðis – en er líka gott t.d. með súpum. Ég er oft með þetta í veislum og er þá með ýmislegt meðlæti með. Brauðið er best nýbakað, en það er líka mjög gott að frysta það og hita það svo örlítið þann dag sem á að nota það.

Ég nota grunn uppskrift af deiginu en svo er hægt að bæta hér um bil hverju sem er bæði út í deigið eða ofan á það. Athugið að ef það á eitthvað að fara út í deigið er best að setja það út í á sama tíma og vökvinn er settur. Það þarf líka að minnka magn vatns á móti ef það sem er sett út í er mjög blautt. Þá er best að setja ekki alveg allt vatnið út í strax heldur bæta frekar við ef þess þarf.

Focaccia brauð:

1 kg. hveiti
30 gr. hunang
30 gr. pressuger eða 21 gr. þurrger
10-15 gr. fínt salt (passa að setja ekki of mikið ef það er eitthvað í brauðinu sem gefur bragð, t.d. fetaostur eða sólþurrkaðir tómatar)
330 ml. volgt vatn
330 ml. heitt vatn
ólifuolía
krydd, hvítlaukur, sólþurrkaðir tómatar, fetaostur, ólífur eða það sem manni dettur í hug hverju sinni.

Hveiti sett í skál. Gerið leyst upp í volgu vatni ásamt hunanginu. Þetta sett útí hveitið. Saltið leyst upp í heitu vatni og svo bætt út í hveitið. Ef það á að vera eitthvað í brauðinu eins og sólþ. tómatar(skornir í minni bita) eru þeir settir í áður en er hnoðað. Minnka vatnsmagnið örlítið ef það sem er sett í er blautt.

Hnoða vel (deigið á að vera blautt samt) og láta hefast í lágmark klst. Setja olíu á bökunarplötu, þrýsta deiginu niður svo að þetta verði svona 1,5 cm. þykk “kaka”. Þetta fyllir eiginlega út í plötuna (líka hægt að gera nokkrar minni kökur) Svo er kryddað með olíu+kryddum.

Ég mauka oftast hvítlauk, og blanda með kryddi(timjan, oregano, basilika) og grófu salti og olíu og svo skellti ég þessu ofaná. Svo eru “potað” með puttunum þannig það verði svona holur og kryddið festist betur. Látið hefast aftur í 45 mín. og svo bakað við 220° í 15-20 mín, eða þangað til brauðið er fallega brúnt.

Kjúklingasalatið hennar Ernu

Á jólunum er varla hægt að komast hjá því að borða mikið af góðgæti. Og mikið af þessu góðgæti er matur sem er þungur í maga og manni líður e.t.v. ekkert allt of vel alltaf eftir allt þetta át. Þá er gott að kunna uppskrift að góðu og léttu kjúklingasalati. Hér er uppáhalds kjúklingasalatið mitt. Það var í matinn í kvöld og verður pottþétt í matinn aftur eftir jól. Það er ekkert heilagt hvað er sett í sjálft salatið, ég breyti oft til og hef mismunandi tegundir af salati, set stundum papriku, stundum tómata og svo framvegis. Allt eftir því hvað maður á hverju sinni. Það var hún Erna Lóa vinkona mín sem bauð mér fyrst upp á þetta salat, þess vegna hefur það alltaf verið kallað Kjúklingasalatið hennar Ernu.

Kjúklingasalatið hennar Ernu:

Kjúklingabringur (Ég krydda þær bara með því sem ég á hverju sinni, en bestar eru þær með þessum kryddum)

Arabískt kjúklingakrydd
Tandorikrydd
Ólífuolía
salt

Blanda af klettasalati, spínati og tilbúinni salatblöndu
cherry tómatar
Vínber
Rauðlaukur
ristaðar pekan-hnetur

kryddi blandað í olíuna og bringurnar síðan marineraðar í allavegana klukkutíma áður en þær eru steiktar á háum hita þannig að þær brúnist aðeins. Þær eru svo settar í ofn í c.a 20 mín eða þangað til að þær eru eldaðar í gegn. Ég nota yfirleitt kjöthitamæli til að vera viss um að þær séu tilbúnar, þ.e. 72°C, en verði ekki of steiktar. Bringurnareru kældar og svo skornar í frekar þunnar sneiðar. Öllu blandað saman.

Dressing:

Þessi salatdressing er algjört æði – frábært að búa hana til og eiga hana svo inn í ísskáp fyrir seinni tækifæri.

1/2 bolli ólífuolía
1 bolli balsamik edik
4 msk sykur
4 msk sojasósa
3-4 kreystir hvítlauksgeirar

Öllu blandað saman í pott og látið sjóða í 2 mín. Þetta freyðir frekar mikið þegar suðan kemur þannig að það er best að hræra hressilega þessar 2 mínútur.
Dressingin látin kólna (ekki í ískáp því þá getur hún skilið sig).

Haframjöls og rúsínukökurnar hennar langömmu

Þriðja sortin sem ég baka fyrir þessi jóla er haframjöls og rúsínukökurnar sem hún Ásdís langamma mín gerði alltaf. Ég reyndar breytti aðeins til og dýfði nokkrum þeirra að hluta til í súkkulaði, kemur svo bara í ljós hvort það verði vinsælla en þær sem eru án súkkulaðis.

Hér er uppskriftin:

Haframjöls og rúsínukökurnar hennar langömmu:

4 bollar haframjöl
3 bollar hveiti
4 bollar sykur
2 bollar rúsínur
400 g. Smjörlíki
2 tsk. matarsódi
2 egg

Haframjöl, rúsínur og smjörlíki er hakkað saman í matvinnsluvél.
Svo er restinni blandað saman við og hnoðað vel.

Rúllur búnar til sem eru svo skornar í sneiðar og settar á plötu.

Bakað við 170°-190°c (fer eftir ofni, lægri í blásturs). Í nokkrar mín, um 5-12 mín (þangað til fallega brúnar)

Súkkulaðibitakökur með daím

Það hafa allir sínar hefðir um jól sem verða að vera til staðar, hjá mér er það graflaxinn eins og hefur komið fram, en það er líka sænska jólaskinkan sem ég mun eflaust skrifa um þegar nær dregur jólum og svo eru það súkkulaðibitakökurnar sem eru gerðar í tonnatali fyrir hver jól. Þessi uppskrift er mjög einföld, en smákökurnar hafa alltaf verið þær vinsælustu af þeim sortum sem ég geri. Ég geri þær með súkkulaðibitum og daím, en það má setja nánast hvað sem er í staðinn fyrir þetta. T.d. kemur mjög vel út að setja lakkrískurl. Mér finnst samt smá súkkulaði vera algjört “must” samt, en um að gera að prófa sig áfram með þetta.

Hér kemur uppskriftin:

Súkkulaðibitakökur með daím:

200 gr. mjúkt smjör
230 gr. sykur (1 bolli)
230 gr.  púðursykur (1 bolli)
2 egg
1 tsk. Matarsódi
1 tsk. Salt
1 msk. Heitt vatn
1 tsk. Vanilludropar
360 gr. Hveiti (2 bollar og 2 msk.)
200-300 gr. Súkkulaðibitar, daím eða hvað sem er, t.d. er lakkrískurl mjög gott. Ég sjálf nota yfirleitt blöndu af daími og súkkulaðibitum
Gott að hafa 200gr. Af daím kúlum og svo ca. 200gr. Af súkkulaðispænum, þá verða þær sérstaklega gómsætar.

Hræra allt nema súkkulaði(og daím) saman í skál. Ef þetta verður of þykkt er í lagi að setja aðeins meira vatn, bara passa að hafa það ekki of mikið. Bæta svo súkkulaðinu út í, nota svo teskeið til að setja á plötu með bökunarpappír og baka í miðjum ofni á sirka 170 °c þangað til þær verða ljósbrúnar, fer eftir ofnum en í sirka 5-12 mín.

Þetta gera sirka 50-60 smákökur og maður getur haft þær mislengi í ofninum eftir því hvort þær eiga að vera alveg stökkar eða aðeins mjúkar í miðjunni.

Smákökur með kanil, súkkulaði og höfrum

Ég geri alltaf sömu smákökurnar, ár eftir ár, en þetta árið ákvað ég að prófa eitthvað nýtt. Ég fann þessa uppskrift í Gestgjafanum, en breytti henni örlítið og prófaði að gera hana í gær. Ég varð heldur betur sátt við hana, þessar smákökur eru æði! Mæli hiklaust með henni. Ekki flókin uppskrift heldur.

Smákökur með kanil, súkkulaði og höfrum:

115 gr. sykur

Graflaxsósan hans pabba

Nú fer að styttast í jólin, og því fylgir hellingur af bakstri og eldamennsku – enda einn af mínum uppáhalds tímum ársins.

Ég er nú þegar byrjuð að baka smákökur, búa til brjóstsykra og fleira í þeim dúr, en meira um það allt saman síðar. Núna ætla ég að segja frá einu af því sem ég gæti ekki verið án á jólunum – graflax + graflaxsósa. Ég þarf engan hamborgarhrygg, engar rjúpur og ekkert hangikjöt, svo framarlega sem ég fæ graflaxinn minn. Og þá er best að vera með heimagerða sósu. Uppáhalds graflaxsósuuppskriftin mín kemur frá pabba mínum, og er eiginlega ekki uppskrift heldur leiðbeiningar um hvað á að vera í sósunni. Magn af hverju innihaldsefni er eitthvað sem maður þarf svolítið að smakka sig áfram með, en ég ætla að reyna eftir bestu getu að sirka þetta út fyrir þá sem vilja prófa. Hér kemur uppskriftin:

Graflaxsósa (hans pabba:)

1-2 dl. majones

1-2 dl. þeyttur rjómi

4-5 msk. púðursykur

4-5 msk. af sinnepi (ég blanda mismunandi tegundum af sinnepi, set smá dijon, helling af hunangssinnepi, og oftast einhverjar fleiri tegundir – en ekki pulsusinnep, held það passi engan vegin)

1-2 msk. dill

Öllu blandað saman og best að láta standa svo í kæli í smá stund áður en hún er borin fram, þannig verður hún bragðmeiri.

Þetta eru allt sirka mál eftir minninu mínu, reyni kannski að skrá þetta niður næst þegar ég bý til sósuna. En best er að smakka til, það þarf t.d. meira af púðursykri en manni grunar, hún á að vera vel sæt – og það er gott að nota eitthvað annað sterkt sinnep en dijon sinnep líka.

Hæ…

… og velkomin á bloggið mitt!

Ég er tölvunarfræðingur en hef alltaf haft gríðarlegan áhuga á matargerð og bakstri. Það er ekki það einfaldasta í heimi að sameina þetta tvennt og þess vegna hef ég verið að tölvulúðast á vinnutíma, en eytt stórum hluta af frítímanum í eldamennsku, uppskriftalestur, bakstur, matarpælingar og allt annað sem gæti tengst því. Ég á mér safn af uppáhalds uppskriftum og er oft að prófa eitthvað nýtt og hef einstaklega gaman að því að miðla því til annarra. Þess vegna varð þessi síða til… Hér mun ég því ræða mat, matargerð, bakstur og allt annað sem getur mögulega tengst þessu á einhvern hátt.

Síðan er á algjöru byrjunarstigi. Útlit og margt annað er ekki tilbúið og mun því breytast með tímanum. Ég mun flokka uppskriftirnar eftir bestu getu, en mun einnig notast við s.k. “tags” til að auðvelt sé að leita í þessu, því stefnan er að síðan verði stútfull af uppskriftum.

Vonandi mun þetta koma einhverjum að notum, ef ekki þá er ég allavegana að fá útrás fyrir mataráhugann án þess að þurfa að drekkja facebookinu í þessu 🙂

Ps. Ég er ekki sú sleipasta í stafsetningu og íslenskri málfræði en ég vona að þið afsakið það… nenni ekki að láta lesa allar færslur yfir 😉