Guacamole

Það eru örugglega til endalaust margar uppskriftir að guacamole, en þar sem ég vil hafa þetta einfalt en bragðgott enda ég alltaf á að gera þetta eins, eða mjög svipað. Hér er mín uppskrift:

Guacamole

1 stórt þroskað avocado eða 2 lítil
1 msk. sýrður rjómi
ca. 1/4 rauðlaukur
2-3 tsk. salsa
1/2 lime
(ferskt Kóríander)
(1 hvítlauksrif)

Avocadoið er skorið í tvennt og steinninn fjarlægður. Svo nota ég oftast skeið til að skafa aldinkjötið innan úr hýðinu. Smá bútur af rauðlauk er sett í skál ásamt avocadoinu, ofan í þetta set ég sirka 1 msk. af sýrðum rjóma. Ég set sýrða rjómann því mér finnst verða svo góð áferð á þessu, en hann er alls ekki nauðsynlegur. í staðinn fyrir að krydda sérstaklega skelli ég svo 2-3 tsk. af salsa út í þetta – það gefur ferskt og gott bragð. Svo kreisti ég hálft lime út í þetta. Oftast set ég svo líka ferskt kóríander út í, einfaldlega af því að ég elska kóríander og það passar mjög vel út í guacamole. En það má alveg sleppa því. Stundum set ég hvítlauk líka, en þar sem ég er oft með mikinn hvítlauk í matnum auk þess sem ég er með hvítlauk í ferska salsanu sem er oftast með matnum þá sleppi ég því oftast.

Þetta er svo allt maukað saman, annað hvort með töfrasprota eða í matvinnsluvél. Þar sem það er bæði rauðlaukur og salsa út í þessu þá verður þetta oftast ekki alveg eins skærgrænt og guacamole er oft. En mér finnst það ekki skipta öllu máli þar sem þetta er svo bragðgott.

Ferskt salsa

Þegar ég geri mexikóskan mat finnst mér eiginlega nauðsynlegt að hafa gott heimagert ferskt salsa með. Þótt það sé svolítil fyrirhöfn er það algjörlega þess virði. Maður getur svo gert þetta eins sterkt og maður sjálfur vill og jafnvel kryddað þetta meira en ég geri. Hér er uppskriftin eins og ég geri þetta.

Ferskt salsa

ca. 5 vel þroskaðir (helst eldrauðir) tómatar
1/2 rauðlaukur
2-3 hvítlauksrif
pínu salt
1/2 lime (safinn notaður)
Ferskt kóríander (1/2 knippi sirka)
(ferskt chili)

Tómatarnir eru skornir í mjög litla teninga, eiginlega hakkaðir eins smátt og hægt er. Það sama er gert við rauðlaukinn. Hvítlaukurinn er annað hvort hakkaður mjög smátt eða pressaður í hvítlaukspressu. Því meiri hvítlaukur þeim mun sterkara verður þetta. Kóríanderið er saxað smátt og svo er þessu öllu blandað vel saman. Lime safinn er kreystur út í og þetta er svo saltað eftir smekk (passa að salta ekki of mikið og smakka til). Ef maður vill hafa þetta enn sterkara er hægt að hakka ferskt chili smátt – en mér finnst þetta yfirleitt alveg nógu sterkt svona án þess að nota chili.

Súkkulaðimuffins með Rolo

Margar af bestu súkkulaðimuffins uppskriftunum eru með miklu súkkulaði, sem getur oft kostað sitt. Þess vegna finnst mér alltaf gott að finna uppskriftir sem eru bragðgóðar en eru bara með kakó í staðinn fyrir bræddu súkkulaði. Þessi sem hér á eftir kemur er svoleiðis uppskrift. Reyndar eru súkkulaðibitar í henni og fyrir þá sem vilja þá er líka gott að setja Rolo í muffinsin, en þetta er alls ekki nauðsynlegt og þau eru alveg góð án þess að vera með þetta tvennt. Þau eru líka einstaklega mjúk og góð, en með svona “crunchy” topp sem mér finnst oft einmitt vanta á heimabökuð muffins. Það er svo alltaf hægt að gera þau enn betri með því að skella kremi á þau, en með súkkulaðinu og Roloinu í finnst mér það ekki þurfa. En með góðu súkkulaðikremi eins og því sem er í þessari uppskrift, eða með bountykreminu sem er hérna er maður kominn alveg ekta bollakökur 🙂

Súkkulaðimuffins
Gerir sirka 18 muffins

100 gr. sykur
200 gr. púðursykur
125 gr. mjúkt smjör
2 egg
260 gr. hveiti
1 tsk. lyftiduft
1 tsk. matarsódi
1/2 tsk. salt
2 tsk. vanilludropar
40 gr. kakó
2 dl. súrmjólk eða venjuleg mjólk
150-200 gr. súkkulaðidropar eða hakkað suðusúkkulaði (má sleppa)
1,5 rúlla Rolo (má sleppa)

Stillið ofninn á 180°C. Ég nota blástur, en undir/yfirhiti hentar fínt líka en þá gæti baksturstíminn orðið örlítið lengri.

Hrærið smjör, sykur og púðursykur saman þannig þetta verði blautur sykurmassi.

Bætið eggjunum út í einu í einu og hrærið vel á milli. Hrærið þetta þangað til þetta verður létt og ljóst.

Bætið hveiti, salti, vanilludropum, lyftidufti, matarsóda, kakó og súrmjólk/mjólk útí og hrærið þangað til þetta er búið að blandast saman. Passið að hræra ekki of mikið því þá verður þetta ekki jafn mjúkt og gott. Að lokum er súkkulaðidropunum bætt við og hrært örstutt til að þeir blandist saman við.

Setjið deigið í form, ég nota alltaf tvær skeiðar og rétt rúmlega hálfylli formin. Ef það á að vera Rolo þá er einum Rolo mola stungið ofan í hvert muffins.  Þetta verða um 18 muffins, allt eftir því hve mikið þið setjið í hvert form.

Þetta er svo bakað í sirka 20 mín. Til öryggis er best að stinga prjóni í eitt muffins til að athuga hvort hún sé tilbúin – ef það festist deig á prjóninum þá þarf að baka þetta aðeins lengur. Ef það á að setja krem á muffinsin þurfa þau að kólna áður en kremið er sett á, þannig það er fínt að taka þau út úr ofninum og gera svo kremið á meðan þau kólna.

Kókosmuffins með bountykremi

Það er löngu kominn tími á nýja færslu hjá mér. Ég hef ekki verið nógu dugleg undanfarnar vikur, en ætla svo sannarlega að bæta úr því. Er með helling af uppskriftum sem bíða þess að fara á síðuna, en ætla að byrja á uppskrift af kókosmuffins sem eru góð ein og sér, en eru enn betri með bountykreminu sem fylgir með. Í fyrsta skipti sem ég gerði þessar bollakökur gerði ég þær í svona mini-cupcakes formum og þær komu einstaklega vel út svoleiðis líka. Þá er uppskriftin bara eins, en tíminn í ofninum styttri, kannski svona 10-12 mín – en best að stinga í með prjón þegar þær byrja að verða dekkri að ofan.

Kókosbollakökur með bountykremi
Gerir sirka 18 stk.

Muffins:

140 gr. sykur
140 gr. púðursykur
160 gr. smjör
2 egg
240 gr. hveiti
1 tsk. lyftiduft
100 ml. kókosmjólk
2 tsk. vanilludropar
1 dl. kókosmjöl

Stillið ofninn á 170°C. Ég nota blástur, en undir/yfirhiti hentar fínt líka en þá gæti baksturstíminn orðið örlítið lengri.

Hrærið smjör, sykur og púðursykur saman þannig þetta verði blautur sykurmassi.

Bætið eggjunum út í einu í einu og hrærið vel á milli. Hrærið þetta þangað til þetta verður létt og ljóst.

Bætið hveiti, vanilludropum, lyftidufti, kókosmjöli  og kókosmjólk útí og hrærið þangað til þetta er búið að blandast saman. Passið að hræra ekki of mikið því þá verður þetta ekki jafn mjúkt og gott.

Setjið deigið í form, ég nota alltaf tvær skeiðar og rétt rúmlega hálfylli formin. Þetta verða um 12-18 muffins, allt eftir því hve mikið þið setjið í hvert form. Ef það á að sleppa bounty kreminu er alveg óhætt að setja aðeins meira í formin – en ef það á að setja kremið á finnst mér betra ef muffinsin séu ekki of stór.

Þetta er svo bakað í sirka 18-20 mín. Eftir 17-18 mín er fínt að stinga prjóni í eina köku til að athuga hvort hún sé tilbúin – ef það festist deig á prjóninum þá þarf að baka þetta aðeins lengur. Muffinsin þurfa svo að kólna áður en kremið er sett á, þannig það er fínt að taka þau út og gera svo kremið á meðan þau kólna.

Bounty krem:

110 gr. mjúkt smjör
450 gr. flórsykur
100 gr. bounty
75 gr. suðusúkkulaði
1/2 tsk. vanilludropar
50 ml. kókosmjólk (eða venjuleg mjólk – ég nota kókosmjólkina ef það er afgangur úr muffinsbakstrinum)

Smjör og flórsykur eru hrærð saman. Þetta hrærist ekkert sérstaklega vel þar sem þetta er frekar þurrt. Súkkulaði + bounty er brytjað niður og brætt annað hvort yfir vatnsbaði eða í örbylgjuofni (passa samt að ofhita ekki ef örbylgjuofn er notaður). Bætið svo súkkulaðibráðinu út í sykurblönduna og þynnið með mjólkinni. Það er ekkert öruggt að það þurfi að nota alla mjólkina, best að þynna bara þangað til þetta er hæfilega þykkt.

Kreminu er svo sprautað yfir muffinsin og að lokum er gott að strá smá kókosmjöli yfir þær 🙂

Einföld eplakaka

Þessi kaka er alveg rosalega einföld, en líka alveg rosalega góð. Og stór kostur að það má frysta hana og þannig eiga alltaf eitthvað heimabakað til ef þess þarf. Hún er góð ein og sér, en enn betri með vanillurjóma eins og ég minnist á hérna, eða bara venjulegum rjóma.

Eplakaka:

Deig:
100 gr. mjúkt smjör
2 dl. sykur
2 tsk. lyftiduft
1 egg
4 dl. hveiti
1,5 dl. mjólk

Fylling:
2-3 epli
4 msk. sykur
1 msk. kanill
Hrærið smjör og sykur vel saman í hrærivél eða með handþeytara. Eggi og lyftidufti er bætt útí og þetta hrært saman þar til þetta verður ljóst. Svo er hveiti og mjólk bætt útí og hrært saman. Það má ekki hræra of lengi og alveg nóg að hætta þegar þetta hefur blandast saman. Þetta á að vera frekar þykkt deig, en það gæti þurft örlítið meira af mjólk stundum.

Kökuform sem er sirka 22 sm. í þvermál er smurt með smjöri og svo er brauðraspi stráð yfir þannig það dreifist yfir allt formið. Deigið er svo sett í formið og dreyft úr því vel.

Eplin eru skræluð og skorin í þunna báta. Hverjum bát er velt upp úr blöndu af sykri og kanil og svo er þeim er þrýst vel ofan í deigið. Ef það verður afgangur af sykurblöndunni má strá því yfir kökuna áður en hún fer inn í ofninn.

Kakan er svo bökuð í 175°C neðarlega í ofninum í sirka 45 mín.

Verði ykkur að góðu!

Vatnsdeigsbollur – skref fyrir skref

Núna nálgast bolludagurinn og þá er ekki annað hægt en að fá sér bollur. Í mínum huga eru það vatnsdeigsbollurnar sem eru hinar einu sönnu bolludagsbollur. Þessar tilbúnu sem fást í búðum og bakaríum finnst mér oft vera hálf þurrar – svona fyrir utan allt rjómamagnið sem er stundum sett á – þannig ég baka þetta eiginlega alltaf sjálf. Sumar uppskriftir virðast vera þannig að það er auðvelt að mistakast með þær, en ég tel mig hafa fundið hina fullkomnu uppskrift og hingað til hefur mér eiginlega alltaf tekist að gera flottar og góðar bollur. Galdurinn við að þetta gangi upp er að mínu mati að hræra eggin saman í skál áður en þeim er bætt við hveitiblönduna. Þá getur maður betur stjórnað magninu því eggin eru misstór og þess vegna getur gerst að deigið verði of þunnt ef of mikið af eggjum fara í það. Hér kemur uppskriftin, skref fyrir skref með myndum þannig að allir geti nú gert þetta. Þetta er nefnilega ekkert mikið mál, og tekur ekki langan tíma. Það er hægt að stækka myndirnar með því að smella á þær.

Vatnsdeigsbollur:
ofnhiti: 200°C
Tími: undirbúningur 20 mín. bökun: 20-30 mín
12 miðlungsstórar bollur

80 g. smjör eða smjörlíki
2 dl. vatn
100 gr. hveiti (1 3/4 dl. )
2-3 egg
1/8 tsk. salt

Stillið ofnin á 200°C. Ég nota blástur, en það er í lagi að nota bara undir og yfirhita. Setjið smjör og vatn í pott. Sjóðið þangað til smjörið bráðnar.

Setjið hveitið út í og hrærið vel með sleif þangað til deigið hættir að festast við pottinn og sleifina. Stráið svo salti yfir og látið þetta standa í nokkrar mínútúr þannig að þetta kólni.

Á meðan deigið er að kólna er gott að hræra eggin saman. Þegar ég nota hrærivélina þá þeyti ég þau bara í hrærivélarskálinni og set svo í litla skál og hef til hliðar. Það er þó nóg að hræra þau bara létt saman í skál með gaffli. Egg eru misstór og þar sem alls ekki má setja of mikið af þeim (þá verða bollurnar flatar) segir uppskriftin að það eigi að vera 2-3 egg, yfirleitt eru 2 egg of lítið en 3 egg örlítið of mikið. Til að koma í veg fyrir að bollurnar klikki eru öll eggin hrærð saman, notað svo það sem þarf og afgangi hent ef það verður einhver. Flestar uppskriftir miða við lítil egg. Mín reynsla er að í þessa uppskrift hérna þarf bara 2 egg ef þau eru stór, 2,5 ef þau eru meðalstór en 3 ef þau eru lítil.

Þegar deigið er búið að kólna aðeins er það sett í skál (hrærivélaskálina ef svoleiðis er notað). Deigið má ekki vera of heitt, það þarf að vera hægt að snerta það og ef maður hrærir aðeins í því á ekki að rjúka úr því. Svo er smá af eggjablöndunni bætt út í og þeytt vel í hrærivél eða með handþeytara og svo sett meira og aftur þeytt vel á milli. Þetta er gert alveg þangað til eggjablandan er alveg að verða búin. Það þarf að passa að setja ekki of mikið. Þetta á að vera frekar þykkt, á ekki að renna heldur eiga topparnir sem maður myndar með hrærivélinni að haldast en ekki renna saman þegar maður hættir að þeyta. Ég nota oftast meðalstór egg og enda alltaf á að henda smá, sirka hálfu eggi.

Deigið er svo sett á plötu með tveim skeiðum, en það er líka hægt að sprauta því þannig þetta verði fallegra. Þetta verða sirka 12 miðlungsstórar bollur. Ef það er erfitt að “móta” bollurnar og deigið rennur út er það of þunnt.

Þetta er svo sett inn í ofn og bakað í 25-30 mín. Það er mjög mikilvægt að opna ekki ofninn fyrstu 15-20 mín. en svo eftir þann tíma er hægt að opna og taka bollu út til að athuga hvort þær séu tilbúnar með því að skera bolluna í tvennt og athuga hvort hún sé of blaut inn í. Oft er betra að hafa þær 2-3 mín lengur inni því ef þær eru of blautar í miðju þegar þær eru teknar út þá eiga þær það til að falla smá saman (en verða samt ekki að klessu, heldur alveg nothæfar).

Bollurnar þurfa svo að kólna aðeins áður en sulta + rjómi – eða eitthvað annað gott – er sett á þær. Í uppáhaldi hjá mér er að setja annað hvort súkkulaðiglassúr ( 1-2 dl. flórsykur, 1 msk. kakó, smá vanilludropar og vatn þangað til þetta er hæfilega þunnt) eða súkkulaðibráð ( 1 plata suðusúkkulaði + sirka 1-2 msk. síróp + 2 msk. af rjóma brætt saman) á bollurnar og svo berjasultu og rjóma inn í 🙂

Ef bollurnar eru settar í poka til geymslu þá eiga þær það til að verða frekar mjúkar. Það er sniðugt að geyma þær bara undir viskustykki fyrst um sinn, ég geri það oftast ef þær eru bakaðar deginum áður en á að borða þær. Þá haldast þær stökkar og fínar.

Ostabrauðrúlla með bláberjasultu

Ég elska osta og finnst heitir ostabrauðréttir æðislegir. Rakst á uppskrift um daginn að súpereinföldum slíkum rétt, rúllutertubrauð, ostur og sulta – gerist ekki einfaldara. Hér kemur uppskriftin. Ath. að myndin sem fylgir er af rúllunni áður en hún fer inn í ofn, ég steingleymdi að taka mynd þegar hún var komin út.

Ostabrauðrúlla með bláberjasultu:

1 rúllutertubrauð

2 Camembert eða Brie ostar

Sirka 1/2 krukka af bláberjasultu – eða blandaðri berjasultu

2 msk. rjómaostur

1 eggjarauða.

Rifinn ostur

Rúllutertubrauðið er rúllað út og smurt með þunnu lagi af sultu. Það þarf að passa að setja ekki of mikið því þá verður þetta of sætt. Osturinn er svo skorinn í bita og raðað á og svo er þessu rúllað saman.

2 msk. rjómaostur og 2 msk. sulta eru hituð þannig að auðvelt sé að hræra þetta saman. Þegar það er búið er þetta tekið af hellunni og einni eggjarauðu blandað saman við. Þetta er látið kólna aðeins áður en þessu er smurt yfir rúlluna. Að lokum er rifnum osti dreift yfir alla rúlluna.

Hún er svo bökuð í sirka 15-20 mín við 180°C.

Muffins með súkkulaðibitum

Þetta er uppáhaldsmuffins uppskriftin mín. Hún er ekkert sérstaklega flókin, en það er mikilvægt að passa að þeyta smjör + sykur vel saman og að hræra ekki of mikið þegar búið er að bæta eggjunum við. Þessar eru mjög góðar einar og sér, en það er líka hægt að skella smjörkremi á þær.

Muffins með súkkulaðibitum:

24 meðalstórar muffins – hægt að hafa þær minni og gera fleiri
Ofnhiti 200°C
Tími: undirbúningur 20-30 mín bakstur 20 mín

5 dl. hveiti
4 dl. sykur
200 gr. mjúkt smjör
3 egg
1/2 tsk. matarsódi
1/2 tsk. salt
1 tsk. vanilludropar
100 gr. súkkulaði
1 lítil dós kaffi- eða karamellu og hnetujógúrt

Byrjaðu á því að hakka súkkulaðið í smáa bita eins og sést á myndinni til hliðar. Það er líka hægt að nota tilbúna súkkulaðidropa í staðinn. Einnig mætti nota súkkulaðispænir, en þá verða ekki neinir almennilegir súkkulaðibitar heldur blandast súkkulaðið meira við deigið.

Setjið smjörið og sykurinn í skál og þeytið þangað til áferðin verður létt og ljós. Þetta getur tekið smá stund, en það er mikilvægt að þeyta nógu lengi því annars verða muffinsin ekki jafn mjúk og góð.

Bætið svo einu eggi við og þeytið áfram, svo næsta eggi og þeytið aðeins meira og að lokum síðasta egginu og þeytið vel þangað til eggin hafa blandast vel við smjörið og sykurinn. Núna á blandan að vera orðin enn ljósari og léttari en hún var áður en eggjunum var bætt út í.

Þegar búið er að setja eggin út í er óhætt að losa skálina frá hrærivélinni ef svoleiðis er notuð. En héðan í frá er best að nota bara sleif eða álíka til að hræra það sem á eftir að hræra. Núna má bæta hveiti, matarsóda, salti, jógúrti og vanilludropum út í og hræra varlega. Ég set stundum aðeins minna af jógúrtinu og set í staðinn smá rótsterkt kaffi út í til að fá enn meiri kaffibragð. Að lokum er súkkulaðinu bætt út í og blandað varlega saman við deigið.

Það er gott að nota muffinsofnplötu með muffinsformum í, en það er líka hægt að nota bara muffinsform – en þá verða muffinsin ekki alveg jafn há. Hálffyllið formin með deigi, best að nota tvær skeiðar til að koma deiginu í formin.

Muffinsin eru svo bökuð í 20 mín í 175°C. Það er gott að stinga prjóni eða tannstöngli í eitt þeirra til að fullvissa sig um að þau eru tilbúin áður en þau eru tekin út. Ef það er deig á prjóninum þurfa þau að vera lengur í ofninum. Þegar búið er að taka þau út úr ofninum er best að láta þau kólna í smá stund áður en átt er við þau eitthvað frekar.

Eins og fyrr sagði eru muffinsin góð ein og sér, en það má líka setja smjörkrem á þau. Þá er gott að nota smjörkremið sem er neðst í þessari uppskrift.  Hægt að nota ýmislegt skraut til að skreyta með og um að gera að leika sér aðeins með matarlitina til að þetta verði skrautlegt og flott 🙂

Rjómapasta með beikoni, sveppum og hvítlauk

Það eru ekki allir jafn óhræddir að taka til hendinni í eldhúsinu eins og ég er. Gott dæmi um það er maðurinn minn. En til þess að hann eldi þarf helst mjög ítarlegar leiðbeiningar svo að ekkert fari úrskeiðis. Ég ætla því að byrja að setja inn einfaldar en mjög ítarlega útskýrðar uppskriftir. Þær verða allar settar í flokkinn “skref fyrir skref” og það verður því auðvelt að finna þær allar með því að smella á flokkinn hér til hliðar. Fyrsta uppskriftin er uppáhaldspastað mitt. Þetta er svona pasta sem hentar vel hvenær sem er, jafnvel sem veislumatur, en er samt alveg ótrúlega einfalt. Við fínni tilefni er gott að skipta út hluta af beikoninu fyrir hráskinku, eða jafnvel steiktum kjúkling. Hér kemur uppskriftin ásamt myndum sem útskýra hvert skref nánar. Athugið að það er hægt að smella á myndirnar til að sjá þær stærri :)´

Rjómapasta með beikoni, sveppum og hvítlauk

(dugar fyrir sirka 4-6)

400-500 gr. pasta – t.d. skrúfur eða slaufur
500 gr. beikon
500 ml. matreiðslurjómi
1 rifinn villisveppaostur (eða annar góður ostur eins og piparostur)
1 box af sveppum
4-5 hvítlauksrif
0,5 – 1 kjötkraftsteningur
smá olía

Sjóðið pastað skv. leiðbeiningum á pokanum. Yfirleitt er það gert sirka svona: 3-4 l. af vatni er sett í stóran pott og beðið eftir að það fari að sjóða. Þá er 1-2 tsk. af salti bætt út í og svo pastanu og soðið í sirka 10 mín (mjög misjafnt eftir tegund pasta, en þetta stendur alltaf utan á pokanum). Þegar pastað er soðið má hella vatninu af því og láta það bíða.

Skerið beikonið í litla bita og sveppina í sneiðar. Hvítlaukurinn er hakkaður smátt eða pressaður. Sirka matskeið af olíu er hituð á pönnu eða í potti. Þegar olían er orðin nokkuð heit er hvítlauknum bætt út í og steiktur þangað til hann er mjúkur og örlítið brúnaður.

Næst er beikoninu bætt út í og það steikt þangað til það er allt gegnum steikt. Að lokum eru sveppirnir settir út í og þeir steiktir þangað til þeir eru mjúkir.

Þegar búið er að steikja beikon, sveppi og hvítlauk er rjómanum bætt út í. Þegar rjóminn er kominn út í er komið að ostinum. Ef það er ekki búið að rífa hann þarf að gera það, en svo má bæta honum út í rjómann. Hrærið svo þangða til osturinn er alveg bráðinn. Þegar þetta er búið að malla í svona 5-10 mín. er best að smakka þetta. Beikonið getur nefnilega verið svo mis bragðmikið og það þarf því stundum að bæta við salti eða kjötkrafti. Ef þetta er ekki nógu bragðmikið er best að byrja á að setja hálfan tening af kjötkrafti. Það má líka nota salt, en mér finnst betra að nota kraftinn. Þegar hálfi teningurinn er orðinn uppleystur og búið að hræra aðeins í þessu er best að smakka aðeins aftur. Ef þetta er ennþá ekki nógu bragðmikið má setja hinn helminginn, en farið varlega, því það er ekki gott að setja of mikið.

Að lokum er pastanu bætt út í og þetta látið malla í 2-3 mín. til viðbótar. Best er að láta þetta standa í svona 5 mín eftir að þetta er tilbúið. Við það þykkist sósan og pastað dregur meira í sig bragðefnin.

Pastað er gott eitt og sér, en langbest er að bera það fram með hvítlauksbrauði og fersku salati. Mitt uppáhaldssalat með þessum rétti er með káli, klettasalati, gúrkum, tómötum, rauðlauk og vínberjum.

Dökk og einstaklega mjúk skúffukaka

Það eru til endalaust margar skúffukökuuppskriftir, og margar þeirra hef ég prófað. Þær eru allar misgóðar, en sú besta og mýksta hingað til er þessi hérna. Hún er líka mjög einföld og það er mikill kostur að hún er rosalega mjúk og endist lengi án þess að verða þurr. Ég nota þessa í allar afmælistertur og sykurmassatertur sem ég hef gert og hún hefur alltaf vakið mikla lukku.

Mjúk skúffukaka

5 dl. hveiti
5 dl. sykur
1,75 dl. kakó
2 tsk. matarsódi
2 stór. egg
2,5 dl. súrmjólk/ab mjólk
2,5 dl. matarolía
1 tsk. vanilludropar
2,5 dl. sjóðandi heitt vatn eða kaffi
1 tsk. salt

Þessi uppskrift er aðeins of lítil í venjulega ofnskúffu, en hún er fín í minni skúffur. Til að gera heila ofnskúffu er gott að gera eina og hálfa uppskrift, eða jafnvel tvöfalda ef maður vill extra þykka köku. Á myndinni hér að neðan er kaka sem var gerð í venjulegri ofnskúffu úr 1,5 – faldri uppskrift.
Allt nema vatnið er sett í skál og hrært aðeins saman. Vatninu er svo bætt við og klárað að hræra. Smjörpappír er settur í ofnskúffuna og svo er pappírinn og hliðarnar smurðar vel áður en deiginu er hellt í. Þetta er bakað í miðjum ofni við 150°C í sirka klukkutíma. Gott að stinga brjón eða hníf í miðjuna til að fullvissa sig um að hún sé bökuð.

Súkkulaðikrem:
1 pakki flórsykur
100 gr smjör
kakó að vild
sletta af köldu kaffi

Flórsykur og mjúkt smjör er hrært vel saman. Kakói er bætt út í þangað til þetta verður hæfilega brúnt. Kaffi er notað til að bleyta upp í og ná þeirri þykkt sem óskað er. Það er gott að hafa kremið frekar fljótandi þegar það er sett á þessa köku því hún er svo mjúk að hún á það til að festast í kremskeiðinni þegar því er smurt á. Það er líka hægt að frysta kökuna aðeins áður en kremið er sett á, þá er þetta minna mál.

Fyrir þriggja ára afmæli sonar míns notaði ég þessa uppskrift, en gerði grænt smjörkrem til að skreyta með. Þetta er uppskriftin að því:

100 gr. mjúkt smjör
2-3 dl. flórsykur
1 stk. eggjarauða (nota eggjahvítu ef kremið á að vera hvítt)
smá vanilludropar
matarlitur

Smjör og eggjarauður eru hrærðar saman þannig þetta verði ljóst og létt. Flórsykrinum bætt við og að lokum matarlit. Passa að setja ekki of mikið af flórsykri svo þetta verði ekki of þykkt.

Útkoman varð þessi:

Frönsk súkkulaðikaka

Ég á mér nokkrar uppáhaldsuppskriftir sem ég geri svo aftur og aftur og aftur – alveg eins og brauðuppskriftin hér að neðan. Þetta er önnur svoleiðis uppskrift. Þessa hef ég gert ansi oft og hún klikkar aldrei. Er alltaf mjög vinsæl og er sú kaka sem þarf sérstaklega að passa að gera nóg af þegar hún er í boði. Hún er góð heit með vanilluís, en er alveg jafn góð köld með rjóma. Svo er stór kostur að hún geymist vel og verður ekkert verri þótt hún sé orðin 1-2 daga gömul. Það má líka frysta hana með eða án krems og bjóða upp á seinna.

Frönsk súkkulaðikaka

Botn:
2 dl sykur
200 g smjör
200 g suðusúkkulaði (eða gott dökkt súkkulaði)
1 dl hveiti
4 stk egg

Súkkulaðibráð:
150 g suðusúkkulaði (eða gott dökkt súkkulaði)
70 g smjör
2 msk síróp

Botn:
Þeytið eggin og sykurinn vel saman.
Bræðið smjörið og súkkulaðið saman við vægan hita í potti eða í örbylgjuofni. Athugið að passa að súkkulaðið brenni ekki ef örbylgjuofn er notaður.
Blandið hveitinu varlega saman við eggin og sykurinn með sleif. Bætið bráðnu súkkulaðinu og smjörinu að lokum varlega út í deigið.

Klæðið botninn í springformi með smjörpappír, smyrjið vel og hellið deiginu í það. Bakið svo við 170°C í 30 mínútur. Það má jafnvel stytta tímann eftir því hversu blauta í miðjunni þið viljið hafa hana. Þegar kakan er tilbúin þarf hún að kólna örlítið áður en hún er tekin úr forminu. Besta aðferðin til að taka hana úr forminu er að losa formið, setja disk á hvolfi á kökuna og snúa henni við þannig að hún liggji á hvolfi á diskinum, taka smjörpappírinn af og hvolfa svo aftur á það fat sem hún að að vera á.

Súkkulaðibráð:
Látið allt saman í pott og bræðið saman við vægan hita. Kælið bráðina svolítið og berið hana síðan á kökuna.
Það er líka í fínu lagi að sleppa súkkulaðibráðinni, og dreifa í staðinn smá flórsykri yfir botninn.

Það er mjög gott að setja jarðaber eða hindber á kökuna áður en hún er borin fram.

Kókos-marengsterta

Það er ekki hægt að halda veislu án þess að vera allavega með eina marengstertu þessa dagana. Amma mín er marengstertusnillingur og þess vegna fannst mér sjálfsagt að leita til hennar til að fá hina fullkomnu uppskrift. Mér finnst samt svo skemmtilegt að breyta til þannig ég breytti henni aðeins – bætti við kókos og kókosbollum og úr varð Kókos-marengsterta 🙂

Kókos-marengsterta

Marengs:
4 eggjahvítur
200 gr. sykur
4 dl. rice crispies
1 dl. kókos
1 tsk. lyftiduft

Krem:
3 eggjarauður
1/4 plata suðusúkkulaði
1 rúlla róló
Flórsykur

2,5 dl. rjómi
3-4 kókosbollur

Eggjahvítur og sykur eru stífþeyttar þangað til hægt er að hvolfa skálinni án þess að innihaldið renni úr. Rice crispies, kókos og lyftidufti er bætt varlega saman við.

Best er að nota kringlótt kökuform og teikna eftir því á tvær arkir af smjörpappír. Setja svo marengsinn inn í hringina þannig að úr verði tveir jafn stórir kringlóttir marengsbotnar.
Baka svo á 100°gr. í allavegana 2 klst. Passa að marengsinn er stökkur þegar hann er tekinn út. Hafa lengur, og jafnvel hækka hitann örlítið ef hann er ennþá mjúkur í miðjunni.

Þegar botnarnir eru tilbúnir eru þeir látnir kólna. Rjóminn er þeyttur og kókosbollurnar kramdar og hrærðar saman við rjómann. Þetta er sett á annan botninn og hinn settur ofaná.

Að lokum er kremið gert. Þá eru eggjarauðurnar þeyttar ásamt 40-60 gr. af flórsykri þannig að þetta verði þykk “leðja” – gæti þurft meira/minna af flórsykri eftir því hve stórar eggjarauðurnar eru. Súkkulaði og róló er brætt saman og bætt út í eggja og sykurblönduna. Hrært saman og ef þetta er of þunnt er meri flórsykri bætt út í. Þessu er svo hellt yfir kökuna.

Mér finnst best að setja kökuna saman kvöldið áður en hún er borin fram. En það fer allt eftir því hversu blaut hún á að vera. Það er líka hægt að útbúa hana löngu áður og frysta hana og taka hana þá út nokkrum klst. áður en veislan byrjar. Hún endist mjög vel í frysti.

Ítalskt pastasalat

Þegar ég held afmælisveislur og önnur boð vil ég helst hafa eitthvað matarkyns á boðstólnum. Ég er sjálf ekkert rosalega mikið fyrir sætindi og kökur og er því hrifnari af t.d. heitum réttum og álíka. Ég reyni því alltaf að vera með mikið af svoleiðis og hef t.d. boðið upp á súpur og pastasalöt. Í þriggja ára afmæli sonar míns núna fyrir viku síðan bauð ég upp á mjög gott pastasalat sem vakti mikla lukku. Ég veit ekkert hvert upprunalegt heiti salatsins er, en ég ákvað bara að nefna það “Ítalskt pastasalat” því það passar einhvern vegin miðað við hráefnin. Uppskriftin kemur upphaflega frá einni sem var í mömmuhóp með mér, en ég er búin að breyta henni örlítið.

Ítalskt pastasalat

300 gr pasta – slaufur, skrúfur eða álíka
6 msk sólþurrkaðir tómatar í olíu
3 msk fersk basilika
3 msk fersk steinselja (ég sleppi þessu stundum, set þá meira af basiliku)
2-3 hvítlauksgeirar
1 dl ólífuolía
2 msk balsamico-edik
1 tsk hlynsíróp (ég hef oft notað venjulegt síróp í staðinn)
(1-2 msk. grænt – pestó ekki í upprunalegu uppskriftinni, í góðu lagi að sleppa en mér finnst betra með pestó)

4 msk hakkaðar og ristaðar pekanhnetur eða furuhnetur
80 gr pepperóní – best að nota þessar litlu sem fást t.d. í Kosti og Krónunni.
2 msk grænar ólífur, skornar í bita.
2-3 msk rifinn parmesan ostur
lítill rauðlaukur skorinn í þunnar sneiðar
klettasalat
nokkrir kirsuberjatómatar skornir í tvennt

salt og pipar

Pastað er soðið í vatni með smá salti eftir leiðbeiningum á pakkanum.

Helmingur sólþurrkuðu tómatanna, helmingur kryddjurtanna, hvítlaukurinn, ólífuolían, balsamicoedikið, sírópið og pestó er látið í matvinnsluvél og mixað í smá stund. Til að auðvelda fyrir er gott að vera búin að skera sólþurrkuðu tómatana í minni bita og kremja hvítlaukinn.
Restin af sólþurrkuðu tómötunum og kryddjurtunum er skorið niður í hæfilega bita.
Þessu er öllu blandað saman við pastað ásamt ristuðum hnetum, pepperóní, ólífum, rauðlauk, klettasalati og kirsuberjatómötum. Saltað og piprað eftir smekk. Að lokum er parmesanostinum stráð yfir allt saman.

Bjórkjúklingur

Mér fannst heilsteiktur kjúklingur ekkert rosalega góður því hann verður svo oft allt of þurr, alveg þangað til ég lærði að gera bjórkjúkling. En þá er bjórdós með bjór og ýmsu öðru í stungið í afturendann á kjúklingnum og hann eldaður þannig, annað hvort á grilli eða í ofni. Þá verður hann alveg rosalega safaríkur og mjög bragðgóður. Besti kjúklingur sem ég hef smakkað, þótt ég segi sjálf frá ;).  Svo er þetta svo einfalt og hollt líka. Hér kemur uppskriftin ásamt leiðbeiningum.

Bjórkjúklingur

1 heill kjúklingur
1 bjórdós (skiptir ekki öllu máli hvaða tegund, meira að segja hægt að nota annað en bjór eins og eplasafa í dós utan af gosi/bjór…)
Sítrónusafi af hálfri sítrónu (eða smá skvetta af tilbúnum sítrónusafa)
Salt
Pipar
0,5 laukur
3-4 hvítlauksrif

smá olía
kjúklingakrydd til að krydda kjúklinginn með

Bjórnum í dósinni er helt í annað ílát og toppurinn af dósinni er klipptur af, svo dósin verði eins og glas. Ef þetta er 0,5 lítra dós þá má minnka hana svo hún verði álíka stór og lítil bjórdós.  Ef maður gerir svona kjúkling oft er jafnvel sniðugt að kaupa sérstakan stand fyrir þetta. Hann fæst í flestum verslunum þar sem hægt er að fá grillvörur. Laukur og hvítlaukur er skorinn gróft og settur í dósina. Salti og pipar er bætt út í og sítrónusafanum. Að lokum er dósin fyllt með bjór. Kjúklingurinn er settur á dósina, þannig að dósin fara í afturendann á honum og hann “sitji” á henni. Hægt er að nota leggina til að hann haldi jafnvægi. Hægt að sjá þetta vel hérna. Svo er kjúklingurinn smurður með smá olíu og kryddaður með einhverju góðu kjúklingakryddi. Ég nota bara það sem ég á hverju sinni.

Ef það á að elda þetta í venjulegum ofni þarf þetta að vera á eldföstu móti. Þetta er svo sett í 180°C heitan ofn, eða beint á grillið, og eldað í sirka 1-1,5 klst. (fer allt eftir stærð kjúklingsins). Ég nota oftast kjöthitamæli til að vera viss um að þetta sé tilbúið. En kjúklingur þarf að vera 72°C til þess að vera alveg eldaður í gegn. Þegar kjúklingurinn er tilbúinn er hann tekinn út úr ofninum (af grillinu) og látinn standa í smá stund. Svo þarf að fara varlega þegar hann er tekinn af dósinni (gott að nota eitthvað eins og viskustykki til að halda utan um hann). Það sem er í dósinni getur verið mjög heitt og því þarf að passa vel að brenna sig ekki.

Gott er að bera þetta fram með kartöflubátum eða hrísgrjónum, fersku salati, rjómasveppaostasósu og heimagerðri kokteilsósu.

Sveppasósa með osti og rjóma

Ég á mér uppáhaldssósu sem er góð með langflestum mat, þó í aðeins mismunandi útfærslum. Hún er líka svo einföld og klikkar aldrei. Uppskriftin dugar fyrir svona 4

Rjómasveppaostasósa

0,5 l. matreiðslurjómi
450 gr. sveppir, annað hvort eitt box eða einn poki af frystum sveppum frá Euroshopper.
0,5-1 stk. villisveppaostur, eða piparostur ef maður vill fá meira piparbragð
smá hveiti (eða sósujafnari) til að þykkja sósuna ef hún er of þunn
Soð af kjöti/kjúkling ef það er til
Kjötkraftur, salt, pipar

Sveppir eru steiktir í smá olíu. Ef þetta eru frystu sveppirnir myndast ágætis magn af vökva sem ég reyni oftast að taka frá og geyma á meðan ég steiki sveppina aðeins betur. Smá vatni bætt út á sveppina (0,5 dl.) eða vökvinn sem var á sveppunum eða soð af kjöti ef það er til(soðinu má líka bæta við þegar rjóminn er kominn út í). Osturinn rifinn. Hálfur ostur dugar, en ef maður vill mikið ostabragð er notaður heill. Rjómanum er bætt út í ásamt ostinum og svo er þetta látið malla í 5-10 mín, eða þar til þetta þykknar aðeins. 0,5-1 kjötkraftur er settur út í ásamt pipar ef það á við. Best að smakka sig til og nota þau krydd sem henta kjötinu. T.d. nota ég pipar ef ég er með nautakjöt. Ef ég er með kjúkling nota ég aðallega soðið af kjúklingnum og kjúklingakraft. Ef ég er að elda lambalæri nota ég soðið af því. Hægt er að nota blöndu af hveiti og vatni eða sósujafnara til að þykkja sósuna í lokin.