Rice Krispies kökur

Síðan ég gerði döðlukonfektið með Rice Krispies um daginn er mig búið að langa mjög mikið í svona klassískar Rice Krispies kökur, svona með súkkulaði í muffinsformum – þannig ég ákvað að skella í eina uppskrift og tók í leiðinni mynd af þessu. Svona uppskrift eiga flestir til, en ég skelli henni inn samt sem áður. Þessi útgáfa er mátulega klístruð og bragðgóð að mínu mati. Svo framarlega sem maður setur ekki of mikið af Rice Krispies í súkkulaðiblönduna þá haldast kökurnar vel saman.

Rice Krispies kökur:
Tími: 20-30 mín + 30 mín til að kæla í ísskáp

100 gr. súkkulaði
60 gr. smjör
5 msk. síróp
5 dl. Rice Krispies

Súkkulaði, smjör og síróp er brætt saman á lágum hita í potti. Þegar þetta er alveg bráðið og er Rice Krispies bætt út í og hrært saman. Svo er þetta sett í muffins form. Ég nota oftast lítil mini muffins form því mér finnst það hæfilegir munnbitar fyrir svona, en það er í góðu lagi að nota venjuleg form.
Að lokum er þetta látið kólna, inn í ísskáp eða í lengri tíma við stofu hita.

Döðlukonfekt

Ég borða almennt ekki döðlur, en í einstaka réttum finnst mér þær góðar. T.d. þegar þær eru beikonvafðar og svo smakkaði ég svona döðlukonfekt um daginn og fannst það rosalega gott. Ákvað að prófa að gera svona sjálf og gerði þá venjulega útgáfu og svo eina þar sem ég bætti smá kókos við. Bæði smakkaðist mjög vel.

Döðlukonfekt:
Tími: 20 mín. (undirbúa) + 60 mín (kæla)

400 gr. döðlur
270 gr. smjör
140 gr. púðursykur
4-5 dl. Rice Krispies
(2 dl. kókosmjöl)

200 gr. suðusúkkulaði

Döðlurnar eru hakkaðar smátt (líka hægt að klippa þær smátt niður). Smjör, púðursykur og döðlurnar eru svo settar í pott og látið malla þangað til smjörið er bráðnað og þetta er orðið að karamellumauki. Þá er Rice Krispies bætt út í (og kókosmjöli ef það á að vera). Svo er þetta hrært saman og sett í eldfast mót, eða á ofnplötu með smjörpappír undir. Það þarf að þrýsta þessu vel í formið. Að lokum er súkkulaðið brætt, annað hvort yfir vatnsbaði eða í örbylgjuofni (passa að það brenni ekki) og smurt ofaná – það kemur vel út að strá smá kókosmjöli yfir súkkulaðið til skreytinga. Þetta þarf svo að fara í ísskáp í sirka klukkutíma – eða þangað til súkkulaðið er búið að harðna. Þá er þetta skorið í hæfilega stóra bita.

Mexikósk kjúklingasúpa

Það hafa flestir smakkað einhverja útgáfu af mexikóskri kjúklingasúpu, enda mjög vinsæl súpa undanfarin ár. Ég byrjaði að nota einhverja uppskrift sem ég fann á netinu, en hún hefur svo þróast hjá mér, en fyrst og fremst hef ég einfaldað hana. Þetta er svona súpa sem þarf ekki að vera eins alltaf. Það er hægt að setja það sem maður á til í hana og hafa hana svolítið eins og maður vill. Það er jafnvel hægt að sleppa kjúkling og nota fleiri tegundir af baunum í staðinn. Ég set oftast nýrnabaunir í hana, en alls ekki alltaf – stundum sleppi ég þeim. Það sem mér finnst skipta miklu máli að hafa er hins vegar ferskt kóríander. En ef maður er ekki hrifinn af því þá sleppir maður því 🙂

Þessi súpa er í grunninn mjög holl og góð, en hún verður að sjálfsögðu óhollari ef maður bætir miklum osti og nachos út á hana – en ef maður sleppir því þá er þetta eintóm hollusta 🙂

Mexikósk kjúklingasúpa:
Tími: 1 klst.
Dugar fyrir 4-6

1-2 paprikur (litur skiptir ekki máli)
3 laukar
3 hvítlauksrif
2 fernur af tómata passata eða 3-4 dósir af hökkuðum tómötum  (tómat passata eru fínt maukaðir tómatar og fæst t.d. í fernum frá euroshopper – sjá mynd til hliðar – mér finnst betra að nota það því ég er ekki hrifin af of miklum tómatbitum )
4-6 kjúklingabringur (ca. 900gr. – 1kg)
1 dós nýrnabaunir eða aðrar góðar baunir eins og pintobaunir. (má sleppa, en gerir súpuna matarmeiri)
1 l. vatn
2 teningar af kjötkrafti
1 tsk. mulið kóríander ( má sleppa )
1 tsk. cumin
1 msk. worchestershire – sósa
1 tsk. chiliduft (má sleppa ef súpan á ekki að vera of sterk)
1 tsk. cayennepipar
3 msk. tómatpúrra (eða 1 lítil dós)
Ferskt kóríander

Skerið laukinn í þunnar sneiðar, hvítlaukur skorinn smátt eða pressaður og paprikan skorin í bita. Þetta er svo steikt þar til þetta er orðið mjúkt. Setjið restina, fyrir utan kjúkling og ferskt kóríander saman við og látið malla á meðan kjúklingurinn er undirbúinn.

Skerið kjúklinginn í bita og gegnumsteikið á pönnu. Þegar súpan hefur fengið að malla í smá tíma (20 – 30 mín. helst) er kjúkling og ferskum kóríander bætt út í.

Súpan er borin fram með sýrðum rjóma, nachos flögum og rifnum osti.

Gúllassúpa

Þessi súpa er mjög einföld og mjög matarmikil – geri hana reglulega því hún er heldur ekki mjög dýr. Svo er hún alls ekki óholl heldur. Þessa súpu er gott að gera með smá fyrirvara því hún er alltaf best ef hún fær að malla lengi. Hún er líka rosalega góð daginn eftir.

Gúllassúpa:
Tími: 1,5-2 klst.
Þetta er frekar stór uppskrift, dugar fyrir alveg 8 manns.

700 gr. nautagúllas
3-4 hvítlauksrif
2 laukar
2 paprikur
2 teningar af kjötkrafti
2 litlar dósir af tómatpúrru
3 bökunarkartöflur
6-8 gulrætur
2 msk. paprikuduft
pipar (svartur)
smá chilikrydd
salt eftir smekk
2-3 l. vatn

Hvítlaukurinn er skorinn smátt eða pressaður, laukurinn saxaður og þetta steikt upp úr smá olíu þar til þetta mýkist. Paprikan er skorin smátt og sett út í ásamt kjötin og steikt þangað til búið er að brúna kjötið. Bætið paprikudufti, svörtum pipar, kjötkrafti, tómatpúrru og vatni út í. Látið malla við vægan hita í lágmark 40-60 mín.
Á meðan er gott að flysja kartöflur og gulrætur og skera niður í litla bita. Þetta er svo sett út í og látið malla áfram þangað til kartöflurnar eru orðnar mjúkar. Ætti að taka svona 20-30 mín. Í lokin er gott að smakka þetta til með salti og pipar og chilikryddi.

Gott að bera fram með sýrðum rjóma og góðu brauði.

Beikonvafðar kjúklingabringur fylltar með sólþurrkuðum tómötum og feta osti

Í dag átti elsti sonur minn 4 ára afmæli og þar sem pulsur og pasta er í uppáhaldi hjá honum ákvað ég að hann skyldi fá það í kvöldmat. Við fullorðnu vorum þó ekkert rosalega spennt fyrir þessu svona á laugardagskvöldi, auk þess sem við áttum von á gestum, þannig ég ákvað að reyna að finna frekar eitthvað annað sem passar með pasta handa okkur. Eftir smá umhugsun ákvað ég að gera fylltar kjúklingabringur með beikoni og reyna að búa til einhverja góða sósu með sem hentar með pastanu. Svolítil tilraunastarfsemi hjá mér – en mikið ofboðslega heppnaðist þetta vel. Þessi réttur er einfaldur og mjög bragðgóður og verður klárlega á boðstólnum aftur. Fyrir þá sem vilja hafa þetta aðeins hollara er hægt að minnka magnið af osti og beikoni og bera fram með heilhveitipasta frekar en venjulegu.

Beikonvafðar kjúklingabringur fylltar með sólþurrkuðum tómötum og feta osti:
Tími: 1 – 1,5 klst.
Ofnhiti: 200 gr.
Dugar fyrir 4-5

1 kg. kjúklingabringur
sirka 15 sneiðar af beikoni
1 krukka sólþurrkaðir tómatar
1 krukka fetaostur
1 dós hakkaðir tómatar
1/2 krukka Sacla tómatpestó (eða 1 lítil krukka frá öðru merki)
1/2 púrrulaukur
3-4 hvítlauksrif
salt + pipar eftir smekk

Bringurnar – aðferð:
Það eru til ýmsar aðferðir við að fylla kjúklingabringur; stinga gat í gegn og “troða” fyllingunni inn; skera vasa í þær og festa svo vel með tannstönglum; fletja þær út og rúlla síðan saman… Ég notaði seinustu af þessum 3 aðferðum, þ.e. ég flatti bringurnar út með kökukefli og setti svo svo 1-2 msk. af fetaosti og nokkra sólþurrkaða tómata á hverja og rúllaði þeim svo upp. Það ætti að fara sirka hálf krukka af hvoru í þetta. Svo er beikoni vafið utan um þær og fest eins og þarf með tannstönglum. Sumir vilja svo steikja bringurnar áður en þær eru settar í ofninn, en þess þarf í raun ekki – ég finn lítinn mun þótt ég sleppi því. Ég raða því bringunum bara í eldfast mót. Set þær svo í 200 gr. heitan ofn og elda í sirka 20-25 mín. Ég nota alltaf kjöthitamæli til að fullvissa mig um að kjúklingurinn sé eldaður, en mælirinn þarf þá að sýna lágmark 72 gráður. Ef maður á ekki svona mæli þá er hægt að skera smá í eina bringu til að athuga stöðuna – það þarf nefnilega að passa að elda ekki of lengi, því þá verða þær þurrar. Á meðan bringurnar eru í ofninum geri ég sósuna. Ég helli henni svo yfir bringurnar þegar um 5 mín eru eftir af eldunartímanum.

Sósan – aðferð:
Hakkið hvítlaukinn fínt eða pressið í hvítlaukspressu. Skerið púrrulaukinn frekar smátt og steikið hann ásamt hvítlauknum upp úr smá olíu. Skerið 1/2 krukku af sólþurrkuðum tómötum frekar smátt. Bætið þeim svo út í laukinn ásamt 1/2 krukku af pestó og einni dós af hökkuðum tómötum. Látið malla í smá stund – þynnið e.t.v. með smá vatni ef þetta fer að verða of þykkt. Smakkið að lokum til með salti og pipar ef þess þarf. Pestóið gefur mjög mikið bragð þannig það þarf ekki endilega að krydda meira.

Þegar um 5-7 mín eru eftir af eldunartíma kjúklingsins eru bringurnar teknar út og sósunni helt yfir. 1/2 krukku af fetaosti er svo dreift yfir þetta allt saman og sett svo aftur inn í ofninn. Þetta er svo tekið út þegar bringurnar eru tilbúnar og fetaosturinn bráðinn.

Gott er að bera þetta fram með pasta og góðu fersku salati og hvítlauksbrauði.

Sörur – skref fyrir skref

Ég hef alltaf miklað það fyrir mér að baka sörur. Einhvern vegin hélt ég að það væri svo rosalega flókið og tímafrekt að ég hef ekki nennt því hingað til. En þar sem ég er í fæðingarorlofi núna, með nægan tíma, þá ákvað ég að prófa þetta. Og þetta er miklu minna mál en ég hélt. Svolítið föndur, en alls ekki flókið. Átti erfitt með að finna hina einu réttu uppskrift, þannig ég endaði á að blanda saman nokkrum. Er núna búin að baka þær aftur og fullkomnaði þá (að mínu mati) uppskriftina og ætla að birta hérna mína útgáfu af þessum ótrúlega góðu smákökum. Læt einnig fylgja aðferðina ásamt myndum fyrir hvert skref – og auðvelda þannig baksturinn fyrir þeim sem vilja prófa 🙂

Þessi uppskrift gerir sirka 80-100 litlar sörur (1-2 munnbitar) eða 50-60 stærri. Hægt er að stækka myndirnar með því að smella á þær.

Sörur
Tími: 1,5-2 klst. með smá bið á meðan þær eru kældar áður en þær eru hjúpaðar með súkkulaði
Ofnhiti: 180°C

Botnar:
250 gr. möndluflögur eða hakkaðar möndlur
225 gr. flórsykur
4 eggjahvítur

Krem:
4 eggjarauður
80 ml. síróp
250 gr. smjör – mjúkt
2 tsk. skyndikaffi
1 msk. heitt vatn
2 msk. kakó

Hjúpur:
300 gr. dökkur súkkulaðihjúpur

Botnar – aðferð:

Setjið möndlurnar og flórsykurinn í matvinnsluvél og keyrið þetta í smá stund. Ég er ekkert rosalega hrifin af möndlum og finnst því best að hafa þær fínmalaðar. Ef maður vill finna meira fyrir möndlunum er í góðu lagi að nota bara hakkaðar möndlur eins og þær eru beint úr pokanum.

Setjið eggjahvíturnar í tandurhreina skál og þeytið þangað til hægt er að hvolfa skálinni án þess að þær renni úr. Best er að hafa eggin við stofuhita til að þetta heppnist sem best.

Blandið flórsykrinum og möndlunum varlega út í eggjahvíturnar. Best er að nota bara sleif eða álíka til að hræra. Ekki hræra of mikið, það er nóg að þetta sé bara blandað saman.

Setjið bökunarpappír á ofnplötur og notið teskeið til að setja deigið á plöturnar. Ef þið viljið ekki mjög stórar sörur þarf að passa að setja lítið deig. Það stækkar aðeins í ofninum þannig það þarf að passa að hafa nóg bil á milli.

Þetta er svo bakað í 10-14 mín. í 180°C eða þangað til þær eru hæfilega stökkar. Það er best að prófa fyrst eina plötu til að ákvarða tímann endanlega, en hann ræðst af stærðinni og því hversu mjúkar/stökkar þær eiga að vera. Mér finnst gott að hafa þær litlar og frekar í mýkri kantinum og hef þær inni í sirka 12 mín. Látið sörurnar kólna áður en þið takið þær af plötunum.

Krem – aðferð:

Byrjið á því að leysa kaffið upp í matskeið af heitu vatni. Látið þetta standa og kólna á meðan þið klárið að blanda saman hinum hráefnunum.  Þeytið eggjarauðurnar vel. Hellið sírópinu út í í mjórri bunu á meðan þið haldið áfram að þeytið rauðurnar. Þeytið þetta svo vel þannig að þetta er mjög ljóst og létt.

Passið að smjörið sé mjúkt (t.d. hægt að hita það örstutt í örbylgjunni) og hrærið það svo saman við eggjablönduna. Bætið svo kakói og kaffi út í eggja og smjörblönduna og þeytið vel þangað til þetta er orðið ljóst og mjúkt. Einstaka sinnum getur þetta skilið sig aðeins, en þá er ekkert mál að hræra bara áfram því þetta verður fínt á endanum. Ef þetta er of lint til að smyrja á botnana er hægt að kæla þetta aðeins áður.

Þegar botnarnir eru kaldir er kremið sett á flötu hliðina á þeim. Mér finnst best að nota skeið til þess að gera það, en þá er auðveldara að setja kremið á þannig sörurnar verði kúptar ofan á líka. Þegar búið er að setja krem á alla botnanna eru þeir kældir í ísskáp eða frysti þangað til kremið hefur stífnað vel, oftast nóg að kæla bara í 10-20 mín.

Að lokum er súkkulaðihjúpurinn bræddur yfir vatnsbaði eða í örbylgjunni (passa bara að það brenni ekki). Kremhlutanum er svo dýft í súkkulaðið þannig að kremið sé alveg falið. Best er að láta súkkulaðið stífna alveg og geyma þær svo í boxi inn í ísskáp eða frysti og taka þær bara út rétt áður en það á að borða þær.

Ostakaka með Rolo

Um helgina var litli strákurinn okkar skírður, þannig ég fékk tækifæri til að baka helling. Ákvað að baka nokkrar kökur sem ég hef gert áður, en langaði líka til að prófa eitthvað nýtt. Rakst á uppskrift að Rolo ostaköku og ákvað að gera hana, en með nokkrum breytingum þó. Þetta kom rosalega vel út – og var alls ekki erfitt. Stór kostur að það þarf ekki að baka neitt, og kakan er fryst þannig það má gera hana löngu áður og svo er hún bara tekin út rétt áður en á að bera hana fram, helst á hún að vera aðeins frosin þegar hún er borin fram. Kakan vakti mikla lukku og það kom mér sjálfri á óvart hversu ótrúlega bragðgóð hún var. Þannig ég mæli klárlega með henni 🙂

Rolo ostakaka:

1 pakki af Bastogne LU-kexi (kanilkex)
100 gr. smjör
300 gr. rjómaostur
150 gr. flórsykur
1 tsk. vanilludropar
5 dl. rjómi
6 rúllur af Rolo
150 gr. sýrður rjómi

Byrjið á því að setja smjörpappír í botninn á smelluformi ( sirka 26 cm. ). Bræðið smjörið og myljið kexið. Blandið þessu svo saman og setjið í botninn á forminu.

Hrærið rjómaost, flórsykur og vanilludropa saman. Þeytið rjómann og blandið honum svo saman við ostablönduna. Bræðið 2 rúllur af Rolo(gott að setja örlítið af rjóma með) og hellið út í rjóma og ostablönduna. Hrærið bara létt, þannig að þetta blandist ekki alveg heldur verði “röndótt”. Hellið svo blöndunni ofan á kexmylsnuna og dreifið vel úr henni. Sléttið þetta eins vel og hægt er.

Bræðið sýrðan rjóma og 4 rúllur af Rolo varlega saman yfir vatnsbaði eða í örbylgjuofni. Passið að hita ekki of lengi ef notaður er örbylgjuofn. Látið þetta kólna aðeins og hellið svo yfir kökuna. Kakan er svo fryst þangað til það á að bera hana fram.

Þegar á að bera hana fram er gott að taka hana út smá stund áður. Hægt er að skreyta hana t.d. með bræddu súkkulaði, en hún er best hálffrosin.

Bananamuffins með stökkum karamellutoppi

Það gerist allt of oft á þessu heimili að bananar gleymist og svo eru þeir orðnir aðeins of þroskaðir til að þeir séu borðaðir einir og sér. Þá er rosalega gott að nota þá í bakstur. Ég geri eiginlega alltaf bananabrauðið sem þið getið fundið hérna, en mig langaði að breyta til og googlaði aðeins til að sjá hvað ég myndi finna. Fann alveg dásamlega bananamuffins uppskrift sem ég prófaði í kvöld og er klárlega strax orðin uppáhalds. Fann líka aðra muffins uppskrift þar sem Nutella var bætt út í áður en þessu var stungið inn í ofninn – hljómaði svo vel að ég ákvað að prófa að gera nokkur muffins með nutella líka. Útkoman var hrikalega góð, bæði með og án Nutella 🙂

Bananamuffins með stökkum karamellutoppi (og Nutella):

Deig:
3, 75 dl. hveiti
1 tsk. lyftiduft
1 tsk. matarsódi
1/2 tsk. salt
3 stórir vel þroskaðir bananar
1,5 dl. sykur
1 egg
70 gr. smjör
1 tsk. vanilludropar
(4 msk. Nutella eða annað sambærilegt – fyrir þá sem vilja enn meiri sykur ;), ég set þetta bara einstaka sinnum út í)

Karamellutoppur:
85 gr. púðursykur
1,5 msk. hveiti
20 gr. smjör (kallt)
0,5-1 tsk. kanill (meira ef maður vill sterkara kanilbragð)
0,75 dl. hnetur (má sleppa)

Bræðið smjörið sem á að fara út í deigið. Bætið eggi, sykri, vanilludropum og stöppuðum banönum út í smjörið. Hrærið þetta vel saman, t.d. með gaffli. Bætið svo hveiti, salti, lyftidufti og matarsóda út í og hrærið saman. Ekki hræra of lengi – það er alveg í góðu lagi að deigið sé svolítið kekkjótt. Setjið deigið í 12-18 form – hafið þau rúmlega hálf full (svona 2/3 full).

Ef það á að vera Nutella í þeim er það hitað örlítið (svo það verði mýkra) og svo er sirka 1/2 tsk. sett út í hvert form. Notið svo tannstöngul eða álíka til að hræra örlítið í þessu svo súkkulaðið dreifist aðeins.

Því næst er hráefnunum sem eiga að vera í karamellu toppnum blandað saman. Púðursykri, hveiti, kanil og hnetum er blandað saman. Smjörið er skorið í litla bita (eða skorið með ostaskera) og sett út í. Svo er þetta mulið í höndunum þangað til þetta verður eins konar mulningur. Mulningnum er svo dreift yfir muffinsin.

Að lokum eru muffinsin bökuð í sirka 20-25 mín í 190°C. Passa að athuga hvort þau séu tilbúin með því að stinga í þau með hníf eða gafli áður en þau eru tekin út.  Þótt það geti verið erfitt að bíða er best að láta þau kólna aðeins áður en þau eru borðuð 🙂

Mexikósk baka

Mexikósk baka, eða Tacopaj eins og Svíarnir kalla hana, er réttur sem er alveg ótrúlega vinsæll hjá vinum mínum úti í Svíþjóð. Ég hef hins vegar aldrei gert svona sjálf fyrr en í kvöld – en það tókst svona rosalega vel að ég ákvað að deila uppskriftinni með ykkur. Það kom mér mikið á óvart hversu einfalt var að gera þetta, var búin að mikla það svolítið fyrir mér að þurfa að búa til deig, forbaka það, gera hakkið og svo það sem er sett ofan á hakkið. En þetta tók töluvert styttri tíma en ég bjóst vil. Svo er stór kostur að það kostar ekki mikið að kaupa hráefnið í þetta. Þegar ég skoðaði uppskriftir að þessu á netinu tók ég eftir því að margar þeirra fara einföldu leiðina og nota tilbúið taco krydd. Ég er samt hrifnari af því að vita nákvæmlega hvað er í matnum mínum og ákvað því að fara frekar flóknari leiðina (sem var svo ekkert flókin). Fyrir þá sem vilja einfalda þetta þá er hægt að nota einn poka af tacokryddi og sleppa þá hvítlauk, tómatpúrru, chilisósu, soja, chiliduft, cumin, kóríander og salti.

Mexikósk tacobaka:

Deig:
3 dl. hveiti
150 gr. smjör
1 tsk. paprikuduft
2 msk. vatn

Hakkfylling:
500 gr. nautahakk
1 laukur
3 hvítlauksrif
2 dl. vatn
1 lítil dós, eða 2-3 msk. tómatpúrra
2-3 msk. chilisósa (t.d. frá Heinz)
2 tsk. chiliduft (sleppið eða minnkið ef þetta á ekki að vera mjög sterkt)
2 tsk. cumin
2 tsk. kóríanderduft
1 msk. sojasósa
1-2 tsk. salt

Ostafylling:
2-3 Tómatar, eða eitt box af kirsuberjatómötum
1 dós, eða sirka 2 dl. sýrður rjómi
3-4 msk. rjómaostur
150 gr. rifinn ostur

Byrjið á að gera deigið, því það þarf smá tíma til að standa og svo til að forbakast áður en fyllingin er sett í það. Skerið smjörið í litla teninga og hnoðið það saman við hveiti og paprikuduft. Þegar þetta er orðið að mulningi er vatninu bætt út í og hnoðað snögglega svo að smjörið bráðni ekki of mikið út af hitanum á höndunum. Þrýstið deiginu svo í bökuform eða annað eldfast mót. Stingið með gaffli hér og þar í botninn og látið deigið standa í smá stund (fínt ef hægt er að setja það í ísskáp á meðan). Bakið svo í 225 °C í sirka 10 mín.

Skerið laukinn smátt og pressið eða hakkið hvítlaukinn fínt, steikið svo ásamt hakkinu þar til hakkið er gegnumsteikt. Bætið vatni, tómatpúrru, chilisósu, sojasósu og kryddum út í og látið sjóða í 10-15 mín, eða þar til vatnið hefur að mestu gufað upp. Gott að smakka þetta til og bæta e.t.v. salti eða öðru kryddi við eftir smekk.

Hrærið sýrðum rjóma, rjómaosti og rifnum osti saman. Skerið tómatana í bita (í helminga ef kirsuberjatómatar) og dreifið yfir hakkið. Dreifið svo ostablandinu yfir tómatana.

Bakið svo í 200 °c í 20 mín, eða þar til ostablandið hefur fengið fallegan lit.

Gott að bera fram með maísbaunum, fersku salati, sýrðum rjóma, avocado í bitum, guacamóle eða því sem ykkur dettur í hug hverju sinni.

Facebook síða

Var að búa til facebook síðu fyrir þá sem vilja fylgjast með þegar ég set nýjar uppskriftir inn – hér er hún: https://www.facebook.com/HerErMaturUmMat 

Endilega like-ið hana 😉

Heitur ostabrauðréttur

Þessi brauðréttur er í svo miklu uppáhaldi að hann er í boði í lang flestum veislum sem ég held – og aðalástæðan er sú að ég er að nota tækifærið því mér finnst hann sjálfri svo góður en fæ hann svo sjaldan. Svo er þetta svo góð tilbreyting við þennan klassíska með skinku og aspas 😉

Uppskriftin er ekkert heilög og ég fer yfirleitt ekki eftir henni staf fyrir staf, heldur nota ég t.d. þá osta sem mér dettur í hug hverju sinni. Stundum sleppi ég skinkunni og stundum sveppunum.

Ostabrauðréttur

4 ostar að eigin vali – ég nota oftast 2 mygluosta eins og Stóri Dímon og Camembert og svo 2 “kryddosta” eins og mexikóost og einhverja ostarúllu.
500 ml. rjómi
100 gr. skinka
100-200 gr. sveppir
1 lítil rauð paprika
Rifinn ostur
smá salt og pipar
Hálft brauð

Ostarnir eru brytjaðir niður frekar smátt svo þeir bráðni fyrr. Rjóminn og ostarnir eru svo settir í pott og hitað þangað til ostarnir hafa bráðnað alveg. Smakkað til með salti og pipar. Stundum þarf ekkert krydd, en það fer alveg eftir ostunum sem maður notar.

Sveppirnir eru skornir í sneiðar og steiktir á pönnu. Skinkan er skorin í litla bita og paprikan er skorin í litla teninga. Brauðið er svo rifið niður og sett í eldfast mót. Ég leyfi skorpunni að fara með en passa að hún sé frekar smátt rifin – það er þó í góðu lagi að sleppa henni, en þá þarf aðeins meira brauð. Sveppunum, skinkunni og að lokum paprikunni er dreift yfir brauðið – því næst er rjómaostablöndunni hellt yfir og að lokum er rifnum osti stráð yfir þetta allt saman.

Þetta er svo bakað í 20-30 mín. í 200 gr. þangað til þetta er alveg heitt í gegn. Svo er þetta borið fram með rifsberjahlaupi.

Karamellu marengsterta með Rice Krispies

Ég er enginn svakalegur aðdáandi marengsterta, en svo bakaði ég þessa fyrir veislu í sumar og þá var ekki aftur snúið. Þessi er klárlega í uppáhaldi og mun eflaust vera á boðstólnum í all nokkrum veislum í framtíðinni. Verð að deila uppskriftinni með ykkur svo að fleiri geti notið hennar 🙂

Karamellu marengsterta með Rice Krispies:

Botn:
4 eggjahvítur
2 dl. púðursykur
1 dl. sykur
5 dl. Rice Krispies
1 tsk. lyftiduft

Karamellubráð:
2 dl. rjómi
120 gr. púðursykur
50 gr. smjör
1 tsk. vanilludropar

Fylling:
1 peli af rjóma
Nóa Kropp, Daím kurl, súkkulaðirúsínur eða eitthvað í þeim dúr (má sleppa samt)

Eggjahvítur, púðursykur og sykur er stífþeytt þangað til hægt er að hvolfa skálinni án þess að innihaldið renni úr. Rice Krispies og lyftidufti er bætt varlega saman við.

Best er að nota kringlótt kökuform og teikna eftir því á tvær arkir af smjörpappír. Setja svo marengsinn inn í hringina þannig að úr verði tveir jafn stórir kringlóttir marengsbotnar.
Baka svo á 150°gr. í 50-60 mín. Í þessari köku á marengsinn að vera pínu mjúkur í miðjunni, en það er í góðu lagi að lækka hitann og baka hann lengur ( 100°C í 2 klst) ef maður vill hafa hann alveg stökkann.

Á meðan botnarnir eru að bakast er hægt að gera karamellubráðina. Þá er allt (rjómi, púðursykur, smjör og vanilludropar) sett í pott og látið sjóða þar til að bráðin þykknar. Passa að hafa ekki of mikinn hita og hræra mjög reglulega til að þetta brenni ekki. Látið þetta svo kólna aðeins áður en þetta er sett á kökuna.

Þegar botnarnir eru tilbúnir eru þeir látnir kólna. Rjóminn er þeyttur og settur ofan á annan botninn. Nóa Kroppi eða öðru nammi er dreift yfir rjómann og svo er hinn botninn settur ofan á. Að lokum er karamellubráðinni hellt yfir varlega.

Mér finnst best að setja kökuna saman kvöldið áður en hún er borin fram. En það fer allt eftir því hversu blaut hún á að vera. Það er líka hægt að útbúa hana löngu áður og frysta hana og taka hana þá út 1-2 klst. áður en veislan byrjar. Hún endist mjög vel í frysti.

Karamellu-súkkulaði brownies með mars

Þessar brownies eru alveg rosalega djúsí og góðar og vekja alltaf mikla lukku þegar ég býð upp á þær. Svo er stór kostur að það er ekki flókið að baka þær 🙂

Ég hef þær þó ekki alveg alltaf alveg eins. Ég set t.d. ekki alltaf hneturnar á þær, og það er misjafnt hvort ég beri þær fram kaldar, skornar niður í ferninga, eða beint úr ofninum og ber þá fram með ís. Ef þær eru bornar fram heitar þá er ekki hægt að skera þær því þær eru of blautar í miðjunni, heldur er best að hafa þetta bara í forminu og leyfa fólki að fá sér með skeið eða álíka. En ef þær fá að kólna í forminu er ekkert mál að skera þær í bita.

Súkkulaði brownies með karamellu:

280 gr. púðursykur
80 gr. hveiti
280 gr. suðusúkkulaði eða jafnvel enn dekkra súkkulaði
200 g smjör
3 egg
2 tsk. vanilludropar
1½ tsk. lyftiduft
¼ tsk. salt
3-4 lítil Mars skorið í litlar sneiðar
50-100 gr. gróf hakkaðar pekanhnetur (hægt að sleppa)

Stillið ofninn á 170°C.
Þeytið eggin, púðursykurinn og vanilludropana vel saman. Blandan á að vera létt og ljós eins og sjá má á myndinni til hliðar (hægt að smella á myndina til að sjá hana stærri).

Saxið helminginn af súkkulaðinu og bræðið hinn helminginn ásamt smjörinu við vægan hita í potti eða í örbylgjuofni. Athugið að passa að súkkulaðið brenni ekki ef örbylgjuofn er notaður.

Blandið hveiti, lyftidufti og salti varlega saman við eggin og sykurinn með sleif. Bætið bráðnu súkkulaðinu og smjörinu að lokum varlega út í deigið. Bætið að lokum söxuðu súkkulaðinu útí og hrærið varlega.

Smyrjið sirka 20 x 30 sm. ferkantað form vel og setjið smjörpappír í botninn. Ef bera á kökuna fram heita þarf ekki að nota smjörpappír. Ég set hana þá frekar í stórt eldfast mót og ber hana fram í því.

Hellið deiginu í formið. Raðið marsbitunum yfir deigið og þrýstið þeim gjarnan aðeins niður svo þeir fari ofan í deigið (það er samt í góðu lagi þótt þeir liggji bara ofan á deiginu). Ef það eiga að vera hnetur á kökunni er þeim dreift yfir áður en hún er svo sett í ofninn. Kakan er svo bökuð í 20-30 mín. eftir því hversu blaut hún á að vera. Ég baka yfirleitt í 30 mín ef ég ætla að bera hana fram kalda.

Ef það á að bera kökuna fram heita þá ber ég hana oftast fram með ís – rjómi er líka góður með henni. En ef hún á að vera köld hef ég bara skorið hana þegar hún hefur kólnað og borið fram eins og hún er. Fínt að hafa rjóma með, en ekki nauðsynlegt. Mæli þó með að skera bitana frekar smátt þar sem þetta er “mikið af því góða” því það er mikið af súkkulaði í þessu, meira eins og að borða konfekt í rauninni 🙂

Hér er svo mynd af henni eins og hún verður oftast ef hún borðuð heit. Svolítið klessuleg, en alveg rosalega góð – og best með vanilluís.

Mjög einfalt bananabrauð

Þegar maður á banana á síðasta snúning er algjör snilld að búa til bananabrauð, og ég get lofað því að það vekur alltaf lukku bæði hjá gömlum sem ungum. Það eru til endalaust margar útgáfur af uppskriftum að bananabrauði – mis hollar og mis einfaldar. Ég hóf einhvern tíman leit að hinni fullkomnu uppskrift og prófaði þessa. Hún er svo einföld og bragðgóð að ég hef ekki prófað margar fleiri. En næst á dagskrá er samt að finna einhverja hollari uppskrift því þessi er ekkert sérlega holl.
En hún er það einföld að nánast hver sem er getur bakað þetta auk þess sem þetta tekur enga stund í undirbúning, mesti tíminn fer í bakstur í ofninum.

Einfalt bananabrauð

3 bananar (helst vel þroskaðir)
3 egg
1,5 bolli hveiti (1 bolli ca. = 2,5 dl.)
1 bolli sykur
1 tsk. matarsódi
1 tsk. salt
smjör til að smyrja formið

Byrjið á því að stilla ofninn á 175°C. Bananarnir eru svostappaðir saman með gaffli. Best að gera þetta bara beint í skálinni sem á að nota fyrir deigið.

Næst er öllu hinu bætt út í og svo er þetta hrært saman með gafflinum. Það á ekki að hræra neitt rosalega vel, heldur aðallega blanda þessu saman.

Formið er smurt með smjöri og svo er deiginu hellt í það.

Þetta er svo sett í ofninn og bakað í sirka 50-60 mínútur. Svo tekið út og látið kólna örlítið áður en þetta er skorið í sneiðar og borðað af bestu lyst, gjarnan með smjöri og jafnvel osti.

Enchiladas a ‘la Unnur

Þessi uppskrift varð til einhvern daginn sem mig langaði rosalega í mexikóskan mat, en vildi þó ekki þetta venjulega eins og fajitas eða taco. Þannig ég skáldaði þessa uppskrift úr því sem ég fann í ísskápnum. Ég hef notað svipaða uppskrift með nautagúllas, nautahakki og kjúkling og allt saman virkar með sömu uppskrift. Bara um að gera að nota það sem maður á til eða það sem manni langar í hverju sinni. Það mætti jafnvel sleppa kjöti og setja í staðinn nýrnabaunir eða aðrar góðar baunir út í þetta. Ég ætla að reyna að hafa þetta eins nákvæmt og hægt er, en þetta er einn af þeim réttum sem ég geri ekki endilega eins í hvert skipti, heldur fer það alveg eftir því hvað ég á og hvað ég nenni hverju sinni. Hún virkar kannski flókin í fyrstu sýn, en er í raun frekar einföld og tekur alls ekki mjög langan tíma að gera. Það er mikill kostur við uppskriftina að það er auðvelt að stjórna því hversu holl hún er. Þegar ég vil hafa hana frekar holla þá nota ég heilhveiti tortillur og nota minna magn af osti. Fyrir utan þetta er uppskriftin nefnilega mjög holl.
Stundum sleppi ég því að nota cumin og hvítlaukskryddið og nota í staðinn tilbúið burrito, fajitas eða taco krydd – það kemur oftast mjög vel út líka 🙂

Enchiladas

1 msk. olía
3-4 hvítlauksrif
1-2 laukur ( fer eftir stærð, 1 stór eða 2 litlir)
1-2 paprikur ( fer eftir stærð – best finnst mér að hafa gula eða appelsínugula, en rauðar og grænar eru í góðu lagi líka)
1 box af sveppum (ef ég er löt nota ég 1 poka af frystum sveppum í sneiðum)
500 gr. kjöt (t.d. nautahakk, nautagúllas, kjúklingabringur eða jafnvel nýrnabaunir eða álíka)
1 dós hakkaðir tómatar
1-2 tsk. Cumin (ath. ekki Kúmen, heldur cumin)
1-2 tsk. salt
1 tsk. hvítlauksduft
Ferskt kóríander
4-6 msk. sweet chili sósa

Rifinn ostur
Tortilla kökur
Salsa sósa

Hvítlauksrifin eru pressuð og laukurinn skorinn í sneiðar og þetta steikt í olíunni þar til þetta mýkist smá. Kjötið er skorið í hæfilega munnsbita og bætt út í þetta og svo er þetta steikt þar til kjötið er alveg gegnum steikt.

Paprika og sveppir eru skornir í sneiðar og bætt út í og allt saman látið malla í smá stund þar til grænmetið er gegnumsteikt.

Næst er 1 dós af hökkuðum tómötum bætt út í ásamt salti, cumin og hvítlauksdufti. Þegar þetta er búið að malla í smá stund er sweet chili sósu bætt út í. Það má alveg sleppa henni, en mér finnst hún gera gæfumuninn. Það þarf að passa að setja ekki of mikið, setja frekar smá og smakka svo. Að lokum er fersku kóríander bætt út í – magnið fer oftast eftir því hvað ég er að elda meira. Ef ég er að nota kóríander í t.d. ferskt salsa þá set ég oftast aðeins minna í enchiladas kássuna. Annars er ágætt að áætla sirka hálft knippi, eða rétt tæplega það. Ég nota alltaf alla stilkana í þetta – þeir gefa helling af bragði líka. Ef ég er að gera ferska salsað sleppi ég stilkunum þar og set þá frekar í kássuna. Það er líka alveg í lagi að sleppa kóríander, en mér finnst þetta lang best með því.

Þegar kássan er búin að malla í örfáar mínútur er kominn tími að setja þetta á tortilla kökurnar og skella þessu í ofn. Á hverja köku set ég smá ost og svo smá kássu og svo rúlla ég saman og set í eldfast mót.

Áður en þetta fer inn í ofninn set ég 1-2 tsk. af salsasósu á hverja köku og svo dreifi ég rifnum osti yfir þetta allt saman. Þetta er svo sett í 200° C heitan ofn í sirka 15-20 mín. eða þangað til osturinn er alveg bráðinn og kominn með smá lit.

Ég geri alltaf heimagert ferskt salsa og heimagert guacamole með þessum rétt, uppskriftirnar að því má finna hérna neðar á síðunni. Svo ber ég þetta fram með fersku salati sem þarf ekki að vera flókið. Oftast er ég bara með kál og gúrkusneiðar. Að lokum er gott að hafa sýrðan rjóma með þessu líka.